भदौ ६,बैतडी:बैतडीमा मिनि ट्रक दुर्घटना हुदा एक जनाको मृत्यु भएको छ ।
जिल्लाको दोगडाकेदार गाउँपालिका २ मकफलकोटमा सु.प.प्र. ०२–००१ क ०७३४ नम्बरको मिनि ट्रक दुर्घटना हुदा सोही ट्रकका साहु सुर्नया गाउँपालिका ६ घर भई हाल कञ्चनपुरको शुक्लाफाँटा नगरपालिका ४ बस्दै आएका ३० बर्षीय जगदीश अवस्थीको घटनास्थलमै मृत्यु भएको हो ।
यसैगरी सो दुर्घटनामा परी सुर्नया गाउँपालिका ६ मूलखटाली घर भएका चालक ३८ बर्षीय अम्मर अवस्थी र कञ्चनपुरको शुक्लाफाँटा नगरपालिका ४ घर भएका राजेन्द्र राना घाइते भएका छन् । सिल्लेगडा–कटौजपानी कच्ची सडकमा बिहिबार साँझ ७ बजेतिर मिटि ट्रक दुर्घटनामा परेको हो ।
घाइते मध्ये चालक अवस्थीको अवस्था गम्भीर रहेको जिल्ला प्रहरी कार्यालय बैतडीका प्रमुख प्रहरी नायब उपरीक्षक दिपक गिरीले जानकारी दिए । घाइतेहरुलाई उपचारका लागि डडेल्धुरा अस्पताल पठाइएको छ ।
ट्रक सडकबाट ५० मिटर तल खसेको बताइएको छ । छड र सिमेन्ट बोकेर जाँदै गरेको ट्रक दुर्घटनामा परेको प्रहरी नायब उपरीक्षक गिरीले बताए ।
घटनाका बिषयमा थप अनुसन्धान भइरहेको प्रहरीले जनाएको छ ।
