जेठ २, डोटी : नेपाली काङ्ग्रेसका नेता दिलबहादुर बमले केदार अखडा माद्यामिक विद्यालयको शिक्षाको गुणस्तर सुधार गर्न विद्यालयलाई एक लाख रुपैयाँ आर्थिक सहयोग गरेका छन् ।
बुधवार बोगटान फुड्सिल गाउँपालिका -२ चाल्समा रहेको केदार अखडा विद्यालयको शिक्षाको गुणस्तरको सुधारका लागि जनप्रतिनिधि, शिक्षक, विद्यार्थी र अभिभावका बिच विद्यालयमै गरिएको अन्तरक्रिया कार्यक्रममा बमले सहयोग गरेका हुन् ।
उनले स्व. बुवा भीम बहादुर बमको सम्झनामा शिक्षाको गुणस्तर सुधारका लागि विद्यालयलाई आर्थिक सहयोग गरेको बताए । उक्त विद्यालय व्यवस्थापन समिति अध्यक्ष समेत रहेका बमले शिक्षक, विद्यार्थी र अभिभावक सबैको सहयोगमा शिक्षाको गुणस्तर सुधार गर्न सकिने पनि बताए ।
शिक्षाको गुणस्तर सुधारका लागि अन्तरक्रिया, छलफल लगायतका कार्यक्रमलाई निरन्तरता दिँदै जाने वडा अध्यक्ष भरत बमले बताए ।
सबैले आ–आफ्नो तर्फ बाट जिम्मेवारी पूर्वक काम गरेमा शिक्षाको गुणस्तरमा सुधार ल्याउन सकिने केदार अखडा माध्यमिक विद्यालयका प्रधानाध्यापक गुमान सीँ बोहराले बताए ।
