पुस ७ गते बैतडी-बैतडीको पाटन स्थीत श्री कृष्ण माविमा पढाउँदै आएका शिक्षक धनबहादुर बिष्टको हत्यामा संलग्न अभियुक्त सार्वजनिक गरिएका छन् । जिल्ला प्रहरी कार्यालय बैतडीले बिहिबार पत्रकार सम्मेलन गर्दै अभियुक्त सार्वजनिक गरेको हो ।
जिल्लाको पुर्चौंडी नगरपालिका ३ न्वादेउ घर भएका प्रजा बहादुर बोहरा र बिमला बोहरालाई प्रहरीले सार्वजनिक गरेको हो ।
कृष्ण माविमै कम्प्युटर डिप्लोमा चौथो बर्षमा अध्ययनरत बिमला छात्राबासमा बस्दै आएकी थिइन् । प्रजा र बिमला श्रीमान–श्रीमति हुन् ।
पौष १ गते राति शिक्षक बिष्टले बिमला बोहरामाथि अभद्र व्यवहार गरिरहेको देखेपछि उनका श्रीमानले हत्या प्रहरी अनुसन्धनबाट खुलेको छ । श्रीमतीलाई अभद्र व्यवहार गरेको झोकमा उनका श्रीमान प्रजा बोहराले शिक्षक बिष्टलाई मुक्का हानेर सिंढीबाट ढलाएको प्रहरीको भनाई छ ।
पत्रकार सम्मेलनमा जिल्ला प्रहरी कार्यालयका प्रमुख प्रहरी नायव उपरीक्षक प्रेमबहादुर शाहीले भन्नुुभयो ‘पौष १ गते साँझको समयमा बिमला बोहरा शौचालय जान्छु भनि बाहिर निस्केकी र ढिलो गर्दा प्रजा बोहराले खोजी गर्दा शिक्षक बिष्टले अँगालो हालेको देखेपछि प्रजा बोहराले शिक्षक बिष्टलाई मुक्का हानेर ढलाए । त्यसपछि प्रजाले उनको छाती र मुखमा हानेर हत्या गरे ।’
छात्रबासमै हत्या गरेका बिष्टको शवलाई घटना लुकाउन छात्रवासको पछाडि दुवै जना मिलेर फालेको प्रहरीको अनुसन्धानले देखाएको छ । घटनाका अभियुक्तमाथि थप अनुसन्धान भइरहेको प्रहरी नायव उपरीक्षक शाहीले बताउनुुभयो । जिल्ला अदालतबाट १० दिनको म्याद थपेर अनुसन्धान भइरहेको उनले बताए । घटनामा अरु संलग्नताका बिषयमा पनि प्रहरीले अनुसन्धान गरिरहेको प्रहरी नायव उपरीक्षक शाहीले बताउनुुभयो ।
शिक्षक बिष्टको शव पौष २ गते दिउँसो फेला परेको थियो । मृतकका आफन्तले उनको हत्या भएको आशंका गरेपछि प्रहरीले घटनाको अनुसन्धान थालेको थियो ।
सो घटनाको अनुसन्धानका लागि सीआइबीको टोली समेत आएको थियो ।
शिक्षक बिष्टको हत्या भएकाले दोषी पत्ता लगाउन माग गर्दै आन्दोलन समेत गरिएको थियो ।