डोटी : डोटीको बोगटान फुड्सिल गाउँपालिका – ६ गगुडाका ४ सय ६० विद्यार्थीलाई शैक्षिक सामग्री वितरण गरिएको छ ।
शुक्रवार कक्षा १ देखि ३ कक्षा सम्म अध्ययनरत वडा भरीका ४ सय ६० विद्यार्थीलाई वडा कार्यालयले शैक्षिक सामग्री वितरण गरेको हो ।
प्रतेक विद्यार्थीलाई २५ कपि, एक प्याकेट पेन्सिल, कटर तथा वर्णमाला लगाएर तीन लाख रुपैयाँ मूल्य बराबरको शैक्षिक सामग्री वितरण गरिएको वडा अध्यक्ष श्याम बोगटीले जानकारी दिए ।
स्थानीय तहको चुनावमा होमिएका बेला आफूले शिक्षालाई पहिलो प्राथमिकता दिएको हुनाले शैक्षिक गतिविधिलाई प्राथमिकता दिँदै आएको अध्यक्ष बोगटीले बताए ।
अध्यक्ष बोगटीले भने ,´आगामी दिनमा विद्यार्थीको लागि वडाबाट कोचिङ क्लासको व्यवस्था गर्ने योजना छ। वडा भित्र रहेका विद्यालयका प्रधानाध्यापक, विद्यालय व्यवस्थापन समितिका अध्यक्ष र केही विद्यार्थीलाई जिल्ला बाहिरका नाम चलेका विद्यालयमा शैक्षिक भ्रमणमा लैजाने योजना रहेको छ ।´
विद्यार्थीलाई वडाले शैक्षिक सामग्री वितरण गरेपछि अभिभावकले खुसी व्यक्त गरेका छन् ।
यो भन्दा पहिला आमा बुवा नभएका वडाका १५ विद्यार्थीलाई व्यक्तिगत लगानीमा झोला, विद्यालय पोषाक लगायतका शैक्षिक सामग्री वितरण गरेको थियो ।
