गणेश मौनी ,डोटी :किसान बहुउद्देश्यीय सहकारी संस्था शाखा कार्यालय सिलगढीले गाउँघरमा किसानहरुलाई सहकारी शिक्षा तथा तरकारी खेती सम्बन्धी जानकारी दिदै आएको छ ।
बहुउद्देश्यीय सहकारीले बुधबार दिपायल सिलगढी नगरपालिका वडा नम्बर ९ देउगडाका किसानहरुलाई सहकारी शिक्षा तथा तरकारी उत्पादन तथा करेसाबारी निमार्ण सम्बन्धी जानकारी दिएको किसान बहुउदेश्यीय सहकारी संस्था शाखा कार्यालय सिलगढीका शाखा प्रमुख अमरराज भण्डारीले बताए ।
उनले भने हाम्रो सहकारीको मुख्य उद्देश्य भनेको प्रत्येक किसानहरुले आ आफ्नो घरघरमा सानो करेसाबारी बनाई आफै उत्पादन गरि स्वच्छ तरकारी खाने हो त्यही अनुरुप सहकारीले विभिन्न कार्यक्रमहरु संचालन गरिरहेको बताए ।
सहकारीले आयोजना गरेको सहकारी शिक्षा तथा करेसाबारी निमार्ण सम्बन्धी छलफल कार्यक्रममा एक सय भन्दा बढी महिला सदस्यहरुको सहभागिता रहेको थियो ।
सुदुरपश्चिम प्रदेश र लुम्बीनी प्रदेश अन्तरगत ३६ वटा शाखा मार्फत विभिन्न कार्यक्रमहरु संचालन गर्दै आईरहेको सहकारीमा ७६ हजार जना शेयर सदस्यहरु रहेको समेत शाखा प्रमुख भण्डारीले बताए ।
