Sujang

भाइटीका

डिल बहादुर महरा”अविचल”
शीर्षक :- “भाइटीका”
 छन्द :- शार्दूलविक्रीडित
                              ।१।
भाग्यो  बादल  साथ  साथ  कुहिरो,गर्मी र बर्षा  सब ।
बेला स्वच्छ शरद् समस्त दिलमा,आनन्दको  वैभव ।।
देखिन्छन् नव  चम्किला  रहरिला,डाँडा र पाखाहरू ।
हेर्छन् दृश्य तिहारका झिलिमिली,आनन्द आँखाहरू।।
                                   ।२।
हाँस्छन् बाग बगान नित्य मदमा,यी फूलका मञ्जरी ।
फुल्छन् फूल यहाँ  जुही मखमली,शृङ्गार भर्ने  गरी ।।
छायो  उत्सुकता  अगम्य  सबमा,उल्लासको पर्व हो ।
हाम्रो धार्मिक  चाड  वर्ष दिनको,विश्वास हो गर्व हो ।।
                                  ।३।
आए    माइतमा   दिदी र बहिनी,उत्साह  बोकीकन ।
बाँड्छन् आपसमा खुसी र ममता,झुल्किन्छ  नौलोपन ।।
पाके  मिष्ठ  अनेक  वस्तु  घरमा,बेला  बन्यो कञ्चन ।
बा  आमा  अनि दाजुभाइ सँगमा,गर्छन् मनोरञ्जन ।।
                                  ।४।
लक्ष्मी  काग  र  श्वान  गोरु सँगमा,गाई   हुने   पूजन ।
दिन्छन्  दाजु र भाइमा  रहरमा, टीका तथा भोजन ।।
हर्षोल्लास  अनन्त  भर्छ  करुणा,प्राणी  सबैमा जब ।
लक्ष्मीले   धन-धान्य  पारिरहने,धर्ती  भरी   गज्जब ।।
                                ।५।
बाँड्छन्  प्रेम  समस्तमा  सुख दिने,रङ्गी र चङ्गी  हुने ।
भर्छन् सोम  सुखानुभूति  सरिता,सम्भावना ल्याउने ।।
“टीका” भाइ तिहार पर्व रसिलो,खुल्छन् यहाँ जीवन ।
मौका ल्याउँछ यो बडो मिलनको,झल्काउँदै यौवन ।।
Ki Singh Doti Another
Salmuni
Leave A Reply

Your email address will not be published.