माघ २४ गते डोटी : शिला स्थान युवा क्लबको आयोजनामा हुने डोटी गोल्डकप २०८२ आगामी चैत ५ गतेदेखि सुरु हुने भएको छ। यसअघि माघ महिनामा प्रतियोगिता सुरु गर्ने तयारी गरिएको भए पनि फागुन २१ गते हुने निर्वाचन आचारसंहितालाई मध्यनजर गर्दै कार्यक्रम सारिएको क्लबले जनाएको छ।
शुक्रबार शिला स्थान युवा क्लबद्वारा आयोजित पत्रकार सम्मेलनमा क्लबका अध्यक्ष हिक्मत मलासीले प्रतियोगिता स्थगित गर्नुको कारण, नयाँ मिति तथा तयारीबारे जानकारी गराए। उनका अनुसार निर्वाचन प्रक्रियाका कारण स्थानीय प्रशासनले माघमा खेलकुद आयोजनामा चुनौती उत्पन्न हुने संकेत दिएपछि क्लबले प्रतियोगिता चैत महिनामा सार्ने निर्णय गरेको हो।
अध्यक्ष मलासीले भने—
“समुदाय, खेलप्रेमी तथा सहभागी टोलीहरूको सहजता सुनिश्चित गर्न हामीले प्रतियोगिताको मिति पर सार्नुपरेको हो।”
“नयाँ मितिमा प्रतियोगिता झनै व्यवस्थित, भव्य र आकर्षक बनाउन क्लबले तयारी तीव्र बनाइसकेको छ,” भन्दै उनले प्रतियोगिताले स्थानीय खेल पर्यटन र प्रतिभा उत्थानमा ठूलो योगदान पुर्याउने विश्वास व्यक्त गरे।
क्लबका अनुसार गोल्डकपमा स्थानीय तथा बाहिरी जिल्लाका प्रतिष्ठित फुटबल टिमहरूको सहभागिता रहनेछ। प्रथमलाई १ लाख पचास हजार र द्वितीयलाई ८० हजार पुरुस्कार रासी समेत रहेकोे आयोजकले जनाएको हो ।
खेल मैदान, सुरक्षा व्यवस्था, टिम व्यवस्थापन र पुरस्कार वितरण कार्यक्रमबारे पनि तयारी तीव्र पारिएको छ।
