रश्मि कुवँर, असोज १५ गते ,डोटी – हिन्दुहरूको महान् चाड वडा दसैँ दीपावली तथा छठ पर्वको अवसरमा डोटीमा सांस्कृतिक कार्यक्रम हुने भएको छ।
भैरव प्रसाद गण र समता एक्सन ग्रुपको आयोजनामा तथा सुदूर पश्चिम कलाकेन्दको समन्वयमा सिलगढीको इन्द्रचोकमा `सिलगढी सांस्कृतिक´ कार्यक्रम हुन लागेको हो।
स्थानीय कला ,संस्कृतिको जगेर्ना यसको संरक्षण संवर्द्धन तथा प्रवर्द्धन गर्ने उद्देश्यले फूलपातीका दिन कार्यक्रम आयोजना गर्न लागिएको भैरव प्रसाद गणका गणपति जनमत बहादुर कार्कीले जानकारी दिए।
उनका अनुसार सांस्कृतिक कार्यक्रममा देउडा गीत,भुवा,हुड्केउलि ,पुतला नाच लगायतका प्रस्तुति रहने बताए ।
सांस्कृतिक कार्यक्रममा वरिष्ठ डेउडा गायक भुवन प्रसाद दाहाल , डेउडा गायक केशव फुलारा, लोक तथा डेउडा गायक शेर साउँद , प्रेम नेपाली , लोक गायक गणेश जिसी , डेउडा गायक टेक ऐर `पद्धवा चोर´, पवित्रा साँकी `मिस पवि´ लगायत स्थानीय कलाकारहरूको बेजोड प्रस्तुति रहेको आयोजकले जनाएको छ।
पछिल्लो समय भैरव प्रसाद गणले जिल्लामा विभिन्न संघ संस्थाको सहयोग तथा समन्वयमा विभिन्न कार्यक्रमको आयोजना गर्दै आइरहेको छ।
