बैतडी :बैतडीमा एक प्रमुख प्रशासकीय अधिकृतलाई तीन पालिका हेर्ने जिम्मेवारी दिएको छ ।
जिल्लाको सिगास गाउँपालिका प्रमुख प्रशासकीय अधिकृत रघुनाथ अवस्थीलाई डिलाशैनी गाउँपालिकाको पनि जिम्मेवारी दिइएको छ । यो संगै संघीय मामिला तथा सामान्य प्रशासन मन्त्रालयले अवस्थीलाई तीन पालिका हेर्ने जिम्मेवारी दिएको हो ।
सुर्नया गाउँपालिकामा प्रमुख प्रशासकीय अधिकृतको रुपमा कार्यरत अवस्थीलाई केही दिन अघिमात्रै सिगास गाउँपालिकाको जिम्मेवारी समेत तोकिएको थियो ।
शुक्रबार मन्त्रालयले पठाएको पत्रमा अवस्थीलाई सुर्नया गाउँपालिकाको कामकाजमा बाधा नपर्ने गरी प्रमुख प्रशासकीय अधिकृत हाजिर नहुँदा सम्म डिलाशैनी गाउँपालिकाको आर्थिक तथा प्रशासनिक कार्यसहितको जिम्मेवारी दिएको उल्लेख छ ।
बैतडीका गाउँपालिकाहरुमा भदौमा खटाएका नयाँ प्रमुख प्रशासकीय अधिकृतहरुको २० दिन नपुग्दै सरुवा गरेपछि अहिले पालिकाहरु प्रमुख प्रशासकीय अधिकृत विहिन भएका छन् ।
