लेखा समिति सभापति खड्काको निर्देशन: ‘सुरक्षाकर्मी र कर्मचारीको मनोबल उच्च राखौँ, बेरुजु नियन्त्रण गरौँ’
राज पार्की,असोज ५ गते, डोटी : देशमा सुशासन कायम गर्न र सरकारी सेवा प्रवाहलाई पारदर्शी एवं प्रभावकारी बनाउन सुरक्षाकर्मी तथा राष्ट्रसेवक कर्मचारीको मनोबल उच्च हुनुपर्नेमा प्रतिनिधिसभाको सार्वजनिक लेखा समितिका सभापति भरतबहादुर खड्काले जोड दिनुभएको छ।
जिल्ला प्रशासन कार्यालय डोटीद्वारा आयोजित कार्यालय प्रमुखहरूसँगको मासिक बैठकलाई सम्बोधन गर्दै सभापति खड्काले भाषणले मात्रै परिवर्तन नआउने भन्दै जनताले प्रत्यक्ष महसुस गर्ने गरी काम गरेर देखाउन कर्मचारीहरूलाई निर्देशन दिनुभयो।
डोटीको विकास र आवश्यकता विशाल रहेको चर्चा गर्दै उहाँले भन्नुभयो, “देशको पूरै बजेट हाले पनि डोटीका आवश्यकता एकैपटक पूरा हुन सक्दैनन्। त्यसैले उपलब्ध सीमित स्रोत र साधनको अधिकतम सदुपयोग गर्दै हामीले नतिजामुखी काम गर्नुपर्छ।”
मुलुकमा बेरुजुको अंक बढेर रु. ७ खर्ब ५५ अर्ब पुगेकोप्रति गम्भीर चिन्ता व्यक्त गर्दै सभापति खड्काले आर्थिक अनुशासनलाई पहिलो प्राथमिकतामा राखेर कार्यसम्पादन गर्न कडा निर्देशन दिनुभयो।
कर्मचारीहरूलाई निर्धक्क भएर काम गर्ने वातावरण बनाउने प्रतिबद्धता जनाउँदै उहाँले थप्नुभयो, “काम गर्ने क्रममा कसैले दबाब वा असहजता सिर्जना गर्छ भने मलाई सीधै गुनासो गर्नुहोस्, म तपाईंहरूको साथमा छु।” आफूले देशको पूँजी र जनताको भावना बुझेकै कारण सात पटक चुनाव लडेर सातै पटक विजय हासिल गर्न सफल भएको दाबी समेत उहाँले गर्नुभयो।
अस्पताल, प्राविधिक शिक्षालय, भूमि व्यवस्थापन, सञ्चार र विद्युत जस्ता आधारभूत सेवाबाट अझै पनि धेरै नागरिक वञ्चित हुनुपरेको यथार्थ औंल्याउँदै सभापति खड्काले सेवाग्राहीको चरित्र वा पृष्ठभूमि नहेरी बिना भेदभाव सेवा दिन अपिल गर्नुभयो।
प्रमुख जिल्ला अधिकारी कल्पना घिमिरे नेपालको अध्यक्षतामा सम्पन्न उक्त कार्यक्रममा जिल्लाको सेवा प्रवाह, विकास निर्माण, इन्धनको अवस्था, अव्यवस्थित बसोबास तथा सुकुम्बासी समस्या र विपद् व्यवस्थापनको पूर्वतयारीबारे छलफल भएको थियो। कार्यक्रममा जिल्लास्थित सरकारी कार्यालयका प्रमुखहरू तथा नेपाल पत्रकार महासंघ डोटीका अध्यक्ष प्रकाश बम लगायतको उपस्थिति रहेको थियो।
