डोटी, जेठ २१ : दिपायल सिलगढी नगरपालिकाको आयोजनामा सिलगढीस्थित टुँडिखेल खेलमैदानमा सम्पन्न प्रथम उपमेयर कप महिला कबड्डी प्रतियोगिताको उपाधि दिपायल सिलगढी नगरपालिका वडा नं. ६ ले जितेको छ।
फाइनल खेलमा वडा नं. ७ लाई पराजित गर्दै वडा नं. ६ ले उपाधिमाथि कब्जा जमाएको हो। प्रतियोगितामा नगरपालिकाभित्रका पाँच वटा टोली सहभागी भएका थिए।
समापन कार्यक्रममा बोल्दै दिपायल सिलगढी नगरपालिकाकी उपप्रमुख कलावती महर साउदले महिलाहरूमा खेलकुदको विकास, नेतृत्व क्षमता अभिवृद्धि तथा स्वस्थ प्रतिस्पर्धाको वातावरण निर्माण गर्ने उद्देश्यले प्रतियोगिता आयोजना गरिएको बताए। उहाँले यस्ता खेलकुद गतिविधिले महिलाहरूलाई खेल क्षेत्रमा थप अघि बढ्न प्रेरणा मिल्ने विश्वास व्यक्त गरे ।
कार्यक्रमका अध्यक्ष तथा दिपायल सिलगढी नगरपालिका वडा नं. ६ का वडा अध्यक्ष नरेश मलासीले नगरपालिकाले खेलकुद क्षेत्रको विकासका लागि विभिन्न गतिविधि सञ्चालन गर्दै आएको स्मरण गराउँदै महिला कबड्डी प्रतियोगिताले महिलाहरूमा थप हौसला र उत्साह प्रदान गरेको बताए।
प्रतियोगितामा प्रथम हुने वडा नं. ६ ले नगद रु. ३० हजार १ सय ११, द्वितीय हुने वडा नं. ७ ले रु. २० हजार १ सय ११ तथा तृतीय हुने वडा नं. ९ ले रु. १० हजार १ सय ११ नगद पुरस्कार प्राप्त गरेका छन्। साथै विजेता टोलीहरूलाई मेडल र प्रमाणपत्रसमेत प्रदान गरिएको थियो।
नगरस्तरीय प्रतियोगितामा सहभागी टोलीहरूले उत्कृष्ट खेल प्रदर्शन गर्दै उपाधिका लागि प्रतिस्पर्धा गरेका थिए। प्रतियोगितामार्फत महिला खेलाडीहरूको प्रतिभा प्रस्फुटन हुनुका साथै खेलप्रति आकर्षण बढाउन महत्वपूर्ण योगदान पुगेको आयोजकको विश्वास छ।
दिपायल सिलगढी नगरपालिकाका खेलकुद शाखा प्रमुख राजबहादुर खड्काले नगरपालिकाले खेलकुद क्षेत्रको विकास तथा महिलाहरूको सहभागिता वृद्धि गर्न आगामी दिनमा पनि यस्ता प्रतियोगिताहरूलाई निरन्तरता दिने बताए।
